Gen 40 | TVK | STEP | Huram vahis mei mitavi, e vatei, moletin te polien lu na suv toto tahal Isip lupol misa pe meten.

Genesis 40

1 Huram vahis mei mitavi, e vatei, moletin te polien lu na suv toto tahal Isip lupol misa pe meten. 2 Tei be vat na ngan xil xa di ladeh uaen man, e tei mun be vat na ngan xil di langgul xat beret an. E ve sexien tei xa tamal ti, tinen misoh xat xalu. 3 Ma miling xalu e he vat na mereketeh xil xa miso xalu lube nim te xeih, e rute xa Siosep mun da en. 4 Di, miling xalu sung e he Siosep tengan ilaxat xalu e ludi visali be nousav vuteili.

5 E vongien tei, moletin xalu vus ak lumetuve. Metuveen nalu xil misav e koute teni xil mun misav. 6 E makoe, melele xa Siosep bemei visal xalu, pus kila xa lunexo pupu. 7 Ma misis xalu bit, “?Veneh ma valnaomil misa mak xosali?”

8 E xalu lubit rilomun ni mini lubit, “Xamel vus matemetuve, e moletin tovuol inggak xa mikila vahit kil koute teni mi xamel.”

Ma Siosep biteni mi xalu bit, “Hi kestang mikila ihit kil metuveen namil. Luhit pisi minou.”

9 Misak ni, vat na moletin xil xa ladeh uaen misep usil nan mini bit, “E metuveen navan, natepus vatit grep tei 10 xa halite tol teti en. E melele xa lateso ute xil, vat takes lateping e huite xil temen tehos. 11 Di, natetal xat valoei te uaen ma suv toto tahal Isip, nateleh viton huit grep xil ak, e natetapus ni teha en. Di, natesa ni mini.”

12 Melele xa Siosep milonge mak, biteni mini bit, “Koute te metuveen nam mak: lit grep xatel ak di pisen melengien tol. 13 E melengien tol imal, suv toto ikesuk uha mini, e imae ni xouk ha vem imase ra nim te xeih. Ti, iling rilomun ni xouk e polien nam, e usa rilomun ni uaen mini ixoni ngan xa di otepol mini tetiamu. 14 E melele xa holesok xil vus mei ihos minuk, nadak kesuk tengan unem nou li e usep usil nou mi suv toto. Imak, ma ututou ni nou tengan nistal ra nim te xeih ak. 15 Uhiteni mini xa moletin xil lakan ni nou ra voninok xati, ut xa mol-Hibru xil ladi en. Uhiteni mun mini xa inou natapol ni ti neta vasa tengan mei nate nim te xeih ak.”

16 Melele xa vat na moletin xil xa di langgul beret pusi xa koute te metuveen xa Siosep biteni bos, xi mun bit rat nan mini bit, “Inou mun natemetuve, e natepus ateli te beret tol xa teti vatuk. 17 Ngan xa tete nesao vari iaxa beret xa bos a suv toto teti en. E tuman xil mei di latea ni.”

18 Siosep biteni mini bit, “Koute te metuveen nam mak: ateli xatel ak di pisen melengien tol. 19 E melengien tol imal, suv toto ikesuk uha mini, e imae ni xouk ha vem imase ra nim te xeih. Ti, moletin nan xil lito xoteh hiraem, ha liso xolen tenbom e liei tei, e tuman xil limei mei lia nuk.”

20 Melengien tol mei mitavi, be melengien xati xa mol-Isip xil di lanem usil melengien xa suv toto nae tepot en. Misak ni, suv toto ak pol ni anien tei xa mahulong del eilep nan xil. E melele nen ak, xi misil moletin tei ba tengan vamae ni vat na moletin xil xa di ladeh uaen man vatel vat na moletin xil xa di langgul beret an lalmea ha vexalu vamase ra nim te xeih. Di, mileh xalu ba lusoh pe meten e pe met eilep nan xil. 21 Suv toto miling rilomun ni vat na moletin xil xa di ladeh uaen man e polien nan xati mun, 22 e mi ngan xa be vat na moletin xil xa di langgul beret an, xi misemae ni moletin nan xil ladela e ba labasi mat. Di, laso xolen tenben de liei tei. Holesok xil ak testal texoni ngan taxa Siosep tehiteni. 23 E vat na moletin xil xa di ladeh uaen tenanem ti mun Siosep, en tebong ni li vari.